ياونـة ونيتهـا مـن خـوا الـراس***من لاهـب بالكبـد مثـل السعيـره

[الحر القطام]

ذهب الإبن دباس من (العودة من سدير ) في طلب الرزق إلى مسقط في عمان وغاب فترة طويلة ... قيل انها ثمان سنوات.
المهم ابو دباس ضعف حاله خلال هذه الفترة وأخذ يتوجد على ابنه .. وارسل له القصيدة المشهوره.
طبعا حيكت حول هذا الموضوع العديد من القصص ... الى درجة ان البعض أوصلها الى انتقام دباس ممن استضعفوا والده (وهم من جماعتهم) وسفك الدماء ... الخ.

ولكني في الحقيقة تحريت من احفاد هذه العائلة .. وافادوني بأن الموضوع لا يعدو حرص والد على عودة ابنه ...عبر التوجد بالأبيات التالية :-






ياونـة ونيتهـا مـن خـوا الـراس=من لاهـب بالكبـد مثـل السعيـره
ونين من رجله غدت تقـل مقـواس=ويون تالـي الليـل يشكـي الجبيـره
ويامل قلـب مثـل بـن بمحمـاس=وياهشـم حالـي هشمهـا بالنقيـره
ويا وجد حالي يامـلا وجـد غـراس=يوم أثمرت وأشفا صفـا عنـه بيـره
من ثمر قلبي سـرى هجعـة النـاس=متنحـر درب عسـى فيـه خيـره
الله يفكه مـن بـلا سـو الأتعـاس=ومن شـر عبثـات الليالـي يجيـره
في ديـرة تقطعـت عنـه الأرمـاس=سبعيـن يـوم للركايـب مسـيـره
لا والله الا حال مـن دونـه اليـأس=حـط البحـر والبـر دون الجزيـره
يا الله يا اللي رد من عقـب مايـأس=يوسف على يعقوب وابصـر نظيـره
ترد علي دبـاس يـا محصـي النـاس=يـا عالـم مـا بالخفـا والسـريـره
يا دباس بأوصيك صن درب الأدنـاس=ترى الـذي مثلـك يناظـر مسيـره
عليك بالتقوى ترى العـز يـا دبـاس=في طاعة اللـي مـا ينجيـك غيـره
هاذي ثمان سنين من رحت يا دبـاس=لا رسالـة جتنـي ولا مـن بريـره
يا دباس عقبك تـرى البـال محتـاس=وعليك دمـع العيـن حـرق نظيـره
وعليك كني في دجا الليـل حـراس=أصبح على حيلـي وعينـي سهيـره
أصبح أنا ما بين طـاري وهوجـاس=وطـواري تطـري علينـا كثـيـره
مثل الوحش قلبي على كـف حبـاس=يكفخ كمـا طيـر سبوقـه قصيـره
متحر من عليـة البيـت يـا دبـاس=أرجي ثـواب الله وأخشـى المعيـره
أخاف من حكي العدا ثـم الأنجـاس=أهـل الحكايـا الطايلـه والقصيـره
ويقـال خـلا عيلتـه عنـز الـرأس=أقفـى وخـلا عيلـة لـه صغيـره
والا فأنـا يابـوك قطـاع الأرمـاس=ما نيب مثبـور أو رجلـي كسيـره
آصلك لو دونك نبا حمـر الأطعـاس=الصلب والصمـان ماهـي عسيـره
مهالـك مـدارك مـا بهـا أونـاس=الا الثعـل والبـوم تسمـع صفيـره
لأركب على وجنا من الهجن عرمـاس=فجحا النحر يـا دبـاس حمـرا ظهيـره
متروسة الفخذيـن مزيوعـة الـرأس=كن الخـلاص عيونهـا يـوم اديـره
أو شبـه ربـدا تخفـق لـلأونـاس=وان رفعـت جنحانهـا مسـذيـره
تنشر من العوده على نـور الأنفـاس=عند الفجـر والليـل مقفـي مريـره
والعصر با لصمان تسمع لها اضـراس=حبل الرسـن خطـر تبتـر جريـره
نهـار ثالـث بيـن حـمـا والأوراس=واره يمينـك جعلهـا لـك سفيـره
ثـم علـى ساجيـة تقلـب الـرأس=تمشي بأهلها فـي البحـور الغزيـره
الى مسقط الفيحاء بها الخيـر محتـاس=لولا الكفر والشـرك يـاوي ديـره
فيها الطبيخ وراهي الخبز يـا دبـاس=يقعـد خـوا الـرأس خنـة خميـره
هي ديرة اللي باغـي كيفـة الـرأس=ولا له أحد همه مـن النـاس غيـره
هيس ولد هيـس للمواعيـن لحـاس=يفرح ليـا نيـدي لذبـح النحيـره
وما قفك ذا يا دباس ما فيـه نومـاس=يصلـح لقيـن مهنتـه طـق زيـره
ترى الفـداوي دون وانشـد النـاس=راعية مـا يذكـر بمـدح او غيـره
ما له سوى طق الحنك منـه واليـاس=وليا انقطع خرجه فـلا لـه ذخيـره
طلب المعيشـه بالحراثـه والأ جنـاس=المشتـرى والبيـع يوصـف وغيـره
قم انهض العيرات مـع كـل فـراس=يـا دبـاس دور خيـر تستشـيـره
جدك وعمانك هـل العـزم والبـأس=أهل المواجيـب مكمليـن القصيـره
يا دباس ما يصبر على البـق والحـاس=الا الـذي مالـه بنجـد عشـيـره
واليوم يا مروي شبـا كـل عبـاس=أنت الرجا يا كعـام وجـه المغيـره
عشرين عام كلها ارجيك يـا دبـاس=مثـل الغريـر اللـي تولـع بطيـره
عدل المناكب هليـع فـرخ قرنـاسي=مناه فـي لطـم الحبـاري شطيـره
عانق خلوج روحت عقـب مـرواس=عنـد العصيـر لبيضهـا مستذيـره
والليل جاها وحال من دونهـا اليـاس=روحها عـل فرقـاه فـرت فريـره
يا دباس أنا يا بوك مـا نيـب بـلاس=ميـر ان عيـلات الرفاقـه كثيـره
جنبت وسط السوق وامشي مع الساس=واخذ شوي الحـق وأتـرك كثيـره
يا دباس لو جبت من دحب الأكيـاس=مختلفـة مــا بـيـن رز ونـيـره
ما لي بها يـا جعلهـا بألـف قبـاس=او جعلها تذهب ولـو هـي كثيـره
يا دباس قلبي كـل ماهـب نسنـاس=شرقيـة هبـت بقلـبـي سعـيـره
والحال يافرز الوغـى مسهـا البـاس=عليـك يـا ناطـح وجيـه المغيـره
وغصون قلبي يا فتـى الجـود يبـاس=غـاد أنـا يابـوك كنـي هشـيـره
من شافنـي يقـول ذا فيـه لسـاس=واللـي بـرا حالـي الهـي خبيـره
لا وعلا من قبـل غـوال الأنفـاس=ومفـارق الدنيـا يجيـنـا بشـيـره
عسى يطق البـاب والنـاس غطـاس=يـا والـي القـدرة عليـك تعبيـره
وصلاة ربـي عـد ماهـب نسنـاس=على النبـي عـدة حقـوق المطيـره

[الحر القطام]

طبعا تبون تعرفون .. وش رد دباس على ابوه.

وصلت القصيدة إلى الإبن دباس وهو في مسقط بواسطة مرسول . وقرأها دباس وندم على تركه لأبيه طوال هذه السنين ، وعلى ما اصاب والده خلالها من مصاعب من قبل جماعته.
كما قرأ في القصيدة تلميحات والده بأنه علم بأن ابنه دباس (طاح في التتن) ...(هههههه). وطبعا ارسل الرد على قصيدة والده بواسطة مرسول ايضا ... ووعد والده في القصيدة بأن يعود اليه قريبا وأن ينصره ويكون في عونه . كما ارسل له هدية عبارة عن سيف قاطع (وهذا معنى " مطرق إفرنجي مصاويبه الراس = ومصلبخ جبته عساني ذخيره "الذي وردت في رد الإبن)

المهم ... بقرائة قصيدة الأب والإبن دباس .. يستطيع القاريء أن يتعرف على القصة بشكل كامل ...
وفق الله الجميع .. واليكم رد الإبن دباس






حى الجواب اللى لفانا من الـراس=جابـه اغـلام ماتوانـا مسيـره
أهلاً هلابه عد ماصيـغ قرطـاس=أوماكتب فوقه من بيوت شطيـره
جواب من هو لى مود من النـاس=أبوي مايوصـف حلـى الغيـره
فرز الوغى كنه على الوكر قرناس=أقـروم ربعـه كلهـا تستشيـره
دليل عيرات إلـى هـب نسنـاس=ثم أدلهم الجو ومـا بـه ذخيـر ه
مهفى الغنم لهل الركايب والافراس=لاروحوا بيتـه عليهـم قصيـره
راعي معاميلٍ لها العبـد جـلاس=للبن يشـرى بالسنيـن العسيـره
هذي بمركاها وهـذي بمحمـاس=وهذي يصبه للوجيـه السفيـره
واخلا فذا ياراكب فوق عرمـاس=مامونة من نقـوة الهجـن عيـره
حمرا وهي في سنها وقم الاسـداس=بالسن لافاطر ولا هـي صغيـره
ماهي لحوح راكبـه بالعصا قـاس=حرم عليها غيـر شيـل النجيـره
والخرج هو وبيوت هيل بقرطـاس=مع مزهب الايام ماهـي كثيـره
وفوقه اغلام منيته قطع الارمـاس=لـو هـو بليـلٍ ماتغيـر نظيـره
واليا لقيت الدار فاجهز بالاحساس=وبلغ سلامي كل ذيـك العشيـره
واختص أبوي اللي نفل جملة الناس=وخصه بعلم وقل ترانـي بشيـره
لايانجـى العـرض يابـو دبـاس=إن كان تشكي الضيم فانا أسيـره
ون سايلك عني ترانـي بنومـاس=وانا احمد اللـي ماتوسـل بغيـره
المدح لو يشرى شريناه باكيـاس=باموالنا نرخص نـدور الستيـره
مطرق إفرنجي مصاويبـه الـراس=ومصلبخ جبتـه عسانـي ذخيـره
من صنع نصراني مشروبه الكـاس=يذكر ورا جـاوه بعيـد مسيـره
ربعٍ نوو فيك الـردا والتخسـاس=مهبول يااللي قال غايب عشيـره
على حق لودع الجمـع بنحـاس=لين العشير إيقوم يلعـن عشيـره
يابوي أنا مارحت ألكيفت الـراس=مع ذا ولاني فـي سفـاه وغيـره
إن ماسكنا الدار من غير هو جاس=ولا نعاف الـدار ونـدور غيـره
كله العين كلمة قلـت ياادبـاس=تشكي وانا دوني ابحـور غزيـره
خذلك يمين امشرع قطاع الانفاس=انه فـلا جتنـي علـوم بصيـره
ان كان تشكي الضيق يابوي لاباس=جاك الفرج يابوي هـو والبريـره
ولافنا يابـوي قطـاع الارمـاس=اصبر على الشده ولو هي عسيـره
يامسندي يابوي شوف اوكد الناس=ثم انشده قل ويش هو في مسيـره
ان كان مايفرح صديقك ابنوماس=تحرم علينا اللى نهـوده صغيـره
مدلول مجهول زها زين الالبـاس=بنت الذي يثني الياجـت كسيـره
طارٍ يقول اظهر وطـارٍ بجـلاس=قمت اشرب التنباك وثره نكيـره
ابغى عسى الله يبرد القلب يانـاس=من لاهب شبت بقلبـي سعيـره
ومن كان غايب فلا يقطع اليـاس=ان قدر الله جاب علمـه بشيـره

[إبراهيم خالد]

الحر القطام ..

الصراحه موضوعك في قمة الرووعه .. وشعر صح لسان الي قاله .. وانامل الي كتبه ..

نترغب منك كل جديد يالغالي ..

تقبل تحياتي .. ابراهيم بن خالد